Skip to main content
Latest News

‘జగన్ గ్రీన్‌సిగ్నల్ ఇస్తే.. 10 మంది టీడీపీ ఎమ్మెల్యేలు పార్టీ మారేందుకు రెఢీ..’

ఏపీ ప్రజలు ఎన్నికల్లో టీడీపీకి బుద్ధి చెప్పినా.. నేతల తీరు మాత్రం మారలేదని ఏపీ మంత్రి అవంతి శ్రీనివాస్ విమర్శలు గుప్పించారు. ప్రజా తీర్పును గౌరవించకుండా ప్రభుత్వంపై బురదజల్లడమే టీడీపీ పనిగా పెట్టుకుందని ఆయన మండిపడ్డారు. ముఖ్యమంత్రి జగన్‌పై నోటికొచ్చినట్లు మాట్లాడితే చూస్తూ ఊరుకునేది లేదన్నారు. మాజీ మంత్రి అయ్యన్నపాత్రుడు జగన్‌పై చేసిన వ్యాఖ్యలకు అవంతి కౌంటరిచ్చారు. జగన్‌పై నమ్మకంతో ఏపీ ప్రజలు 151 సీట్లు ప్రజలు కట్టబెట్టారని గుర్తు చేశారు. ప్రజలు నమ్మకంతో ఆయన్ను ముఖ్యమంత్రిగా ఎన్నుకున్నారని.. అలాంటి వ్యక్తిపై తీవ్ర వ్యాఖ్యలు చేయడం దారుణమన్నారు. ఐదేళ్ల అరాకచం, దోపిడీని చూడలేక ప్రజలు వైసీపీకి పట్టం కట్టారని.. ప్రజలు ఇచ్చిన తీర్పును ఎవరైనా గౌరవించాల్సిందేనన్నారు. ప్రజలు గూబ గుయ్యమనేలా తీర్పు ఇచ్చినా టీడీపీ నేతలు ఇష్టం వచ్చినట్లు మాట్లాడటం దారుణమన్నారు.

ముఖ్యమంత్రిని రౌడీ అంటూ అయ్యన్న వ్యాఖ్యానించడం దారుణమని అవంతి వాపోయారు. గతంలో విశాఖలో భూ కబ్జాలు చేసింది అయ్యన్న సహచరులేనని .. అప్పుడు సాక్షాత్తూ మంత్రిగా ఉన్న ఆయనే వెళ్లి ఫిర్యాదు చేశారని గుర్తు చేశారు. ఇసుక, నీరు-చెట్టు, భూముల దోపిడీలు టీడీపీ హయాంలోనే జరిగాయన్నారు. రాష్ట్ర ప్రభుత్వం 4లక్షలమందికి ఉద్యోగాలు ఇవ్వడం రౌడీయిజమా.. అమ్మఒడి లాంటి పథకాలు పెట్టడం రౌడీయిజమా అంటూ ప్రశ్నించారు. జగన్ రెడ్డి సామాజిక వర్గం నుంచి 51మంది గెలిస్తే నలుగురికే పదవులు ఇచ్చారని గుర్తు చేశారు. ఎన్నడూ లేని విధంగా ఐదుగురికి డిప్యూటీ సీఎంలు.. దళిత, గిరిజన, మైనార్టీలకు ఉప ముఖ్యమంత్రి పదవులు ఇచ్చిన ఘనత జగన్‌కు దక్కుతుందన్నారు. ఓ దళిత మహిళకు హోంమంత్రి పదవి ఇచ్చి గౌరవం ఇచ్చారనీ.. అయ్యన్నపాత్రుడుకు ఇవన్నీ కనిపించడం లేదా అన్నారు. అసెంబ్లీ సాక్షిగానే టీడీపీ సింబల్ మీద గెలిచిన ఎవర్నీ పార్టీలోకి తీసుకోమని జగన్ చెప్పారని గుర్తు చేశారు. అందువల్లే టీడీపీకి ప్రతిపక్ష హోదా అయినా మిగిలి ఉందని ఎద్దేవా చేశారు. జగన్ గ్రీన్ సిగ్నల్ ఇస్తే టీడీపీ నుంచి ఓ 10మంది ఎమ్మెల్యేలు గోడ దూకి వచ్చేందుకు సిద్ధంగా ఉన్నారని సంచలన వ్యాఖ్యలు చేశారు. విశాఖ జిల్లా నుంచి కూడా కొందరు ఎమ్మెల్యేలు రెడీగా ఉన్నారన్నారు.

మరిన్ని  రాజకీయ వార్తల కొరకు మా పాలిటిక్స్ పేజీ ని వీక్షించండి... 

Telugu News Online