Skip to main content
Latest News

నా రాజకీయ జీవితమంత ఉండదు నీ వయసు.. జగన్‌కు చంద్రబాబు కౌంటర్

తెలంగాణ రాష్ట్ర ప్రభుత్వం కాళేశ్వరం ప్రాజెక్టు నిర్మించినప్పుడు ఏపీలో ముఖ్యమంత్రిగా చంద్రబాబు ఉన్నారని, అప్పుడు ఆ ప్రాజెక్టును ఆయన ఎందుకు అడ్డుకోలేకపోయారని ఏపీ ముఖ్యమంత్రి వైఎస్ జగన్ నిలదీశారు. నీటిపారుదల ప్రాజెక్టులపై గురువారం అసెంబ్లీలో జరిగిన చర్చ సందర్భంగా అధికార, ప్రతిపక్ష సభ్యుల మధ్య తీవ్రస్థాయిలో చర్చ జరిగింది. ప్రతిపక్షంలో ఉన్నప్పుడు కాళేశ్వరం ప్రాజెక్టుకు వ్యతిరేకంగా మూడురోజుల పాటు దీక్ష చేపట్టిన జగన్.. ముఖ్యమంత్రి హోదా ఆ ప్రాజెక్టు ప్రారంభోత్సావానికి ఎలా వెళ్తారని టీడీపీ నిలదీసింది. దీనిపై స్పందించిన సీఎం జగన్.. ఐదేళ్ల పాటు సీఎంగా ఉన్న చంద్రబాబు కాళేశ్వరం ప్రాజెక్టును ఎందుకు అడ్డుకోలేకపోయారని ప్రశ్చించారు. ఐదేళ్ల పాటు ఆయన గాడిదలు కాశారా? అని ఎద్దేవా చేశారు. 

చంద్రబాబు చక్రం తిప్పిన సమయంలో ఆల్మట్టి డ్యామ్ ఎత్తు పెంచితే ఎందుకు నోరు విప్పలేదని జగన్ ప్రశ్నించారు. పదేళ్ల నుంచి ఏపీకి కృష్ణా జలాల లభ్యత తగ్గిపోయిందని, ఇది చంద్రబాబు చేసిన నిర్వాకమేనని అన్నారు. తాము పొరుగు రాష్ట్రాలతో సఖ్యతగా ఇచ్చిపుచ్చుకునే ధోరణి కనబరుస్తున్నామని, కలహాలు పెట్టుకుంటే సమస్యలు పరిష్కారం కావన్నారు. తాను అధికారం చేపట్టేనాటికి కాళేశ్వరం ప్రాజెక్టు పూర్తయిపోయిందని, ఆ ప్రాజెక్టును అప్పుడు అడ్డుకోలేకపోయిన టీడీపీ నేతలు ఇప్పుడు తమపై బురద జల్లడానికి ప్రయత్నిస్తున్నారని జగన్ మండిపడ్డారు. బావమరిది భౌతికకాయాన్ని పక్కన పెట్టుకుని పొత్తుల గురించి మాట్లాడిన చంద్రబాబు తమను విమర్శించడం విడ్డూరంగా ఉందన్నారు. రెండు తెలుగు రాష్ట్రాలు సఖ్యతగా ఉండే హర్షించాల్సింది పోయి విమర్శలు చేయడం తగదని జగన్ అన్నారు. 

జగన్ వ్యాఖ్యలపై స్పందించిన చంద్రబాబు నాయుడు... తన రాజకీయ అనుభవమంత వయసు ఉండదని జగన్‌కు కౌంటర్ ఇచ్చారు. దీంతో జగన్ ఒక్కసారిగా ముసిముసి నవ్వులు నవ్వుకున్నారు. అన్నీ తనకు తెలుసుసని విర్రవీగడం మంచిది కాదని చంద్రబాబు హెచ్చరించారు. కేసీఆర్ హిట్లర్ అని, కాళేశ్వరం వస్తే తెలంగాణ, ఆంధ్ర పాకిస్థాన్ మాదిరి అవుతాయని జగన్ చెప్పిన విషయాన్ని చంద్రబాబు గుర్తు చేశారు. రెండు రాష్ట్రాల మధ్య నీళ్ల సమస్య కొన్ని సంవత్సరాలుగా నడుస్తోందని, నీళ్లపై టీడీపీ పోరాటాన్ని వివరించారు. ముఖ్యమంత్రి జగన్ చాలా ఈజీగా చెప్పేశారని అన్నారు. గట్టిగా మాట్లాడితే తాము భయపడిపోతామని అనుకుంటున్నారని, ఐదు కోట్ల ప్రజలు ఆలోచిస్తున్నారన్న విషయాన్ని గుర్తుంచుకోవాలని చంద్రబాబు అన్నారు.