Skip to main content
Latest News

విశాఖలో దారుణం.. ఊరి నడిబొడ్డున్న అతడిపై పెట్రోల్ పోసి తగలబెట్టారు..!

విశాఖపట్నం జిల్లాలో దారుణం చోటుచేసుకుంది. మూఢనమ్మకాలు మరో ప్రాణాన్ని బలితీసుకున్నాయి. చేతబడి నెపంతో ఓ వ్యక్తిని గ్రామ నడిబొడ్డున తాళ్లతో కట్టేసి పెట్రోల్ పోసి సజీవ దహనం చేసిన అత్యంత అమానవీయ ఘటన ఏజెన్సీ ప్రాంతంలోని డుంబ్రిగుడ మండలం పుట్టబంద గ్రామంలో వెలుగుచూసింది. గ్రామానికి చెందిన లోకోయి రామచంద్రు కూతురు రాధకు కిల్లో జయరాం(54) చేతబడి చేశాడని ఆరోపిస్తూ పంచాయతీకి పిలిచారు. జయరాం, అతని కుటుంబ సభ్యులు మధ్యాహ్నం సమయంలో పంచాయతీ వద్దకు వెళ్లారు. అక్కడ ఎవరూ లేకపోవడంతో తిరిగి ఇంటికి వచ్చేశారు. ఆ తరువాత సాయంత్రం సమయంలో పంచాయితీ ఉందని మళ్లీ జయరాంను పిలిచారు. 

Read Also : ప్రియుడితో పెళ్లికి రెండేళ్లు ఆగలేను.. సారీ డాడీ.. సారీ మమ్మీ..

పంచాయితీ వద్దకు వెళ్లిన జయరాంను తాళ్లతో కట్టేసి రామచంద్రు కుటుంబీకులు లోకోయి పరశురాం, ముకుందు, నందు, మోహన్, జమున, పద్మలు దాడి చేసి తీవ్రంగా కొట్టారు. జయరాం కాళ్లు, చేతులు కట్టేసి నాలుగు గంటల పాటు చిత్రహింసలకు గురిచేశారు. అడ్డుకునేందుకు యత్నించిన భార్య చెల్లమ్మ, కుమార్తె కమలను చంపేస్తామని మారణాయుధాలతో బెదిరించారు. చివరకు గ్రామ నడిబొడ్డున కర్రలు పేర్చి పెట్రోల్ పోసి రోడ్డుపైనే జయరాంను సజీవదహనం చేశారు. ప్రాణభయంతో కొండగుట్టలు ఎక్కి రాత్రికి రాత్రే వేరే గ్రామానికి పారిపోయినట్లు జయరాం భార్య, కుమార్తె చెప్పారు. విషయం తెలుసుకున్న స్థానిక తహసీల్దార్ గ్రామానికి చేరుకుని సంఘటన స్థలాన్ని పరిశీలించారు. ఘటనకు బాధ్యులను కఠినంగా శిక్షించాలని పోలీసులను ఆదేశించారు. కారకులకు శిక్ష పడేలా చూస్తామన్నారు. అరకులోయ సీఐ ఆధ్వర్యంలో కేసు దర్యాప్తు చేస్తున్నారు.

మరిన్ని క్రైమ్ వార్తల కొరకు మా క్రైమ్ న్యూస్ పేజీ నీ వీక్షించండి.

Crime Stories Telugu