Skip to main content
Latest News

ఎస్సైనే చంపబోయారు.. దుండిగల్‌లో దొంగల బీభత్సం

హైదరాబాద్ నగర శివారులోని దుండిగల్‌లో దోపిడీ దొంగలు బీభత్సం సృష్టించారు. ఏకంగా ఎస్సైనే కారుతో గుద్ది చంపే ప్రయత్నం చేశారు. దొంగతనం యత్నాన్ని అడ్డుకోబోయినందుకు ఈ దారుణానికి తెగించారు. చాకచక్యంగా వ్యవహరించడంతో దుండిగల్‌ ఎస్సై శేఖర్‌ రెడ్డి ప్రాణాలతో బయటపడ్డారు. ఆదివారం (సెప్టెంబర్ 22) రాత్రి చోటు చేసుకున్న ఈ ఘటనకు సంబంధించిన వివరాలు ఇలా ఉన్నాయి..

దుండిగల్‌ ప్రాంతంలోని ఓ నగల దుకాణం వద్ద ఆదివారం రాత్రి ఓ వ్యాన్‌ అనుమానాస్పదంగా నిలిచి ఉంది. దుండిగల్ ఎస్సై శేఖర్‌ రెడ్డి తన సిబ్బందితో కలిసి అటుగా వెళ్తూ.. ఆ వాహనాన్ని గమనించారు. తమ వాహనాన్ని నిలిపేసి వ్యాన్ వైపు కదిలారు.

పోలీసుల రాకను గమనించిన దొంగలు.. వ్యాన్‌తో వేగంగా ముందుకు దూసుకొచ్చారు. అడ్డుకోబోయిన ఎస్సై శేఖర్‌ రెడ్డిని ఢీకొట్టాలని చూశారు. ప్రమాదాన్ని గ్రహించిన ఎస్సై వెంటనే పక్కకు తప్పుకున్నారు. అనంతరం తమ వాహనంలో దొంగలను వెంబడించారు.

వ్యాన్‌ను దూలపల్లి అడవుల్లోకి మళ్లించిన దొంగలు వాహనాన్ని అక్కడే వదిలేసి పరారయ్యారు. వ్యాన్, కట్టర్‌, షెటర్‌ తెరిచేందుకు ఉపయోగించే సామగ్రిని పోలీసులు స్వాధీనం చేసుకున్నారు. పట్టుబడిన వ్యాన్ కొద్ది రోజుల కిందట అల్వాల్‌లో చోరీకి గురైనట్లు పోలీసులు గుర్తించారు.

ఎస్సై శేఖర్ రెడ్డిపైకి దోపిడీ దొంగలు వ్యాన్‌తో దూసుకొస్తున్న దృశ్యాలు సీసీటీవీ కెమెరాల్లో నిక్షిప్తమయ్యాయి. పరారైన దొంగల కోసం పోలీసులు గాలింపు ముమ్మరం చేశారు. నగర పరిధిలోని పోలీస్ స్టేషన్ల సిబ్బందిని అప్రమత్తం చేశారు.

మరిన్ని క్రైమ్ వార్తల కొరకు మా క్రైమ్ న్యూస్ పేజీ నీ వీక్షించండి.

Crime Stories Telugu